أمل "كلاكيت تاني مر"

البوست ده أمل متعرفش عنه حاجة ولا اتفقنا عليه زي باقي البوستات .. بس جوه قلبي كلام عايزة اقوله .. شفت أمل انهرده وهي بتشتغل .. :) بافرح بيها البنت دي وهي بتشتغل .. بحسّها منطلقة ونشيطة ومتّقدة حماس وبديهة .. أنا فخورة بأمل

راجل مش مان

الرجل الحقيقي لا يُعرف من بطاقته الشخصية وإنما من أصغر المواقف يبدو معدنه الأصلي .. كلمة رجل بعد تحريفها أصبحت تحمل تعريفات عدة .. فرجل يعني قوي بدنياً وتبدو قوته هذه في عضلاته .. ويعني صوت أجش عالي .. ويعني حمشنة .. يعني مفيش مانع يجيب اخته من شعرها لو لقاها بتنفض الشباك .. ومفيش مانع لو خرج هو مع بنت الجيران .. يعني يقعد مأنتخ مستني لما مامته أو مراته تحط له الميه بشاليموه في بقه .. يعني يشتم شتايم شوارعية وكل كلامه يبقى له معنايين .. يعني تبقى الكلمة كلمته والشورة شورته ومياخدش رأي الجارية اللي ابوه جابهاله .. يعني ممكن جدا تكون دقنة نابتة كده لا حالقها ولا مربيها ومش مهم ده راجل .. طظ فـ دي رجوله يا أخي .. تبقى راجل طول بعرض وعبد للعادات المتخلفة يبقى انت عندك مشكلة

..

راجل يعني حضن كبير يكون دنيا للست في حياته .. دنيا تسعدها مش تاخد منها .. حضن حنيّن وحنانه نابع من قوته .. قوة يعني حكمة وتفكير بالعقل مش بالانفعال .. قوة يعني مواجهة مش هروب .. قوة يعني حسن تصرف مش يغرق ف شبر مية عشان يتصرف بسرعة وخلاص حتى لو غلط .. قوة يعني كل حاجة ف حياة مراته .. يعني مراته وهو جنبها متبصش لأي راجل تاني وتتمنى جوزها زيه حتى لو كان التاني ده مهند.. يعني مراته بتسمع كلامه عشان بتثق ف رأيه مش عشان صوته عالي .. يعني مقدر ان الفرق بين الراجل والست انهم نوعين مختلفين لجنس واحد .. كل واحد له دور لايقل عن التاني في الحياة .. يعني "يقدر" يكون كل حاجة للست اللي معاه .. ويفهم ان مشاعره مش ضعف دي منتهى القوة .. يعني يفهم الفرق بين الصح والغلط وانه مش عشان راجل فمن حقه يغلط .. يفهم ان الحب الحقيقي حريّه مش تملّك .. يفهم انه يكون مسئول عن الإشباع العاطفي لأهل بيته مش حاجة سطحية أبدا

..

راجل يعني أب وقت الاحتياج للتفهم والعاطفة والاهتمام والتدليل .. يعني أخ وصديق وقت الاحتياج للمشورة والمساندة .. يعني ابن ياخد من حب المرأة وحنانها واهتمامها

..

يعني لما تلجأ له المرأة في لحظة ضعف يقدر يحتويها ويسندها ويكون ضهرها بجد لما الدنيا تديها على دماغها

..

راجل يعني كرامة لو واحدة مش عايزاه فعلا ميفضلش يلح عليها أو بالقوة

..

يعني واحد تاخدي رأيه في مشكلة خاصة من غير ما ينصب لك استجواب

..

يعني جمال الست يكون نابع - في نظره- من جواها

..

راجل يعني رأيه من دماغه مش من دماغ المجتمع

..

راجل يعني عقل مما لا ينفي منه العاطفة

..

راجل يعني عنده أسباب عشان يتجوز وعنده أسباب عشان يتجوز واحدة معينة

..

راجل يعني يعتذر لو غلط وميكررش غلطه ويتحكم في نفسه وانفعالاته

..

راجل يعني يحترم كلامه ويوفي بوعوده ويكون واضح في الغرض من علاقاته

..

راجل يعني يعتمد عليه في المواقف الصعبة

..

راجل يعني ضمير وشرف

..

راجل يعني أمانة .. يعني يقدر يحافظ على أي أمانة مهما اتعرض لضغوط .. يعني أي بنت في الشارع مش ملكية عامة

..

الراجل بكلمته .. وبرعايته لبيته وأسرته

..

خليك قد المسئولية .. خليك راجل

إيمان

محاولة

نحن فى زمن الذكور لا الرجال

مقولة تكونت فى خاطرى قبل أن اسمعها على الأفواه وأقرئها مكتوبة بالفنط العريض فى كل العيون

اختلاط غبى أصبح يسكن معتقدات الذكور يجمعون فيه بين مايجب وبين ماهو كائن... فأصبحت ألسنتهم تلهث بكلمة الرجولة وقوامتها فى مقابل سيل من المضمون المتناقض والذى يخلو من أى صلة بهذه الكلمة ليس هجومًا ولا عنصرية للمرأة بل بحثًا عن الرجل فى حياة فقدنا فيها الكثير والكثير

فالذكور أمهر الكائنات على قراءة نصف النص واستغلاله لتشكيل حياة مشبعة بالتناقضات الصارخة والتى أول ماتفعله هو تحطيم عامود الاحترام الأساسى لكونه إنسان...

(أنا أثق فى نفسى ولكن لا أثق فى أى رجل آخر ) مقولة اتحدى أنها لابد وأن تكون ذكرت على ألسنة كل الذكور التى نعايشهم ... وكأنه حينها يرى فى نفسه الشخص الملاك الذى يلتزم يتعاليم دينه ويحترم عاداته المجتمعية ويقدس إنسانيته وإنسانية ذلك الكائن المسمى (بالأنثى)، شخص لايرى المرأة على أنها مجرد كائن تكميلى لحياته ولايتعامل معها على أنها موجودة لخلق المتعة لديه سواء تحت غطاء الصداقة أو الزمالة أو الارتباط أو الحب أو حتى الزواج....
فهو ابنًا لسيدة أقل مايمكن أن توصف به أنها أم، وأخًا لفتاة تقاسما معًا الحياة منذ صغرهما لكنه الأذكى والأنصح بحكم الفطرة طبعًا، والأقدر على مواجهة الحياة بالقوة والتصدى لمغرياتها وملذاتها كونه ذكر لايعيبه ماقد يعيبها فهى مسئولة منه!!!!!

اممم المسئولية كلمة مهمة فى قاموس الذكور تعنى أن ينفق ويفكر ويخطط للحياة كونه الأجدر!!
فمثلا حين يتعرف الشاب على فتاة فى مجال عمل ما، ويعجب بها لأخلاقها واحترامها وسلوكياتها ومهاراتها وحضورها و....و .....ويأخذ على أساس مامضى قرار منحته العظيمة باختيارها زوجة له بدافع تلك المشاعر المكناه بالحب ليؤسسوا حياة جديدة مشتركة.... حينها يتذكر الرجل مسئوليته تجاه من ستحمل اسمه وتربى أطفاله فيطالبها بترك عملها خوفًا عليها وغيرة ممن تخالط من أقرانه الذى يعرف هو فقط دوافعهم تجاهها، ثم يبدأ بانتقاد سلوكياتها التى اختارها من أجلها حتى يتسنى له قولبتها فى قالب يتناسب وشخصيته اللامحددة الملامح... حيث تاهت منه من فرط تجاربه.. فالرجل لايكون رجلا إلا بتجاربه واحتكاكه مع الحياة بشكل مشروع أوغير مشروع فهول يحمل بطاقة رقم قومى تؤكد أنه ذكر ...

ارجع تانى وأقول بالعــــامية مش عنصرية ولكن بحثًا عن رااااااااااجل بجد يعرف معنى الرجولة الحق ويمارسها مع أبعد الناس قبل أقربهم... راجل تشتم فيه رائحة النخوة.... راجل تثمنه بكلمته وحكمته ... راجل قادر على محاسبة نفسه والاعتراف بالخطأ ... راجل يحتوى المرأة ف حياته ويحتاج لاحتوائها ليه... راجل يرحم ضعف المرأة ويقدر عزتها ... يكون صالح لمهمة الأبوة بحنوه وحزمه ورؤيته السديدة اللى بيحتاجها البيت... راجل تقدر الست تتسند عليه مع إنه لاسوبر مان ولاهيروو بس بيعرف يسندها نفسيًا قبل أى حاجة ... بيعرف يشوفها صح... بتعرف الست تتكلم معاه فى أدق تفاصيل مشاعرها وهى واثقة إنه فيه إنسان بيسمعها وعقل بينورلها وحضن بيحميها ...

سواء كان أب أو أخ أو زوج أو صديق لازم يكون عادل مفيهوش طبع الغدر ... أيوه لقيتها عارفين إيه؟؟؟ صفة النبل اللى نسيناها من كتيييييير ... الصفة اللى بتظهر فى تفاصيل صغيرة قوى قوى قبل المواقف الكبيرة قوى برضه

نفسى بجد مجتمعنا يرجع ويحمل فى رحمه رجال يمتلكون من (الحكمة والاتزان والحنان ورجاحة العقل والعفوية والعدل والنخوة والتصالح النفسى والذكاء والاحترام والصراحة والاحتواء والحب والتسامح والوضوح والنبل والمسئولية والشرف و...) يعنى باختصار يمتلكون من الرجــــــــــــــــــولــــــــة مايعيد التوازن لحياتنا

أمل

صباح يوم جديد

اليوم .. هو يوم خاص جدا .. أول مرة علي حيسيبني ساعات كتير أوي .. مش متخيّلة البيت من غيره .. من غير هزاره وجنانه وشقاوته .. وريحة نَفَسه .. حبيبي .. أول يوم مدرسة انهرده .. بس انا مش خايفة على علي .. عشان عارفة انه راجل بس على صغيّر .. عارفة انه حيعرف يتصرف بلباقة ومش حيسيب حقه .. عارفة انه حيكون أذكي طفل في الفصل ..

بعدما أصريت إنه ميدخلش حضانة واني اعلمه بنفسي .. اتعلم حاجات كتير أوي .. ألف به وآي بي .. وبباه درس له واحد اتنين .. وجبت له محفظ قرآن .. ومدرس ياباني .. وطبعا السباحة في النادي

ده كله كان جميل وكان بيجمعني بعلي أطول وقت ممكن .. كأني كنت في جيوبه باطل منها ع العالم طول الوقت .. بس دايما كنت باحس انه محتاج يحتك بأطفال أكتر من صحاب النادي وقرايبنا .. يمكن دي كانت غلطتي .. بس ملحوقة يعني .. اه يانا ع اللي حشوفه انهرده

طبعا قبلها مهدت له الحكاية ونزلنا اشترينا حاجات المدرسة كلها سوا .. وخليته اختار كل حاجة لنفسه .. ماعدا ألوان اليونيفورم .. وانهرده اديتله ورقة جدول جديدة وعملت له جدول حصص مخصوص على موبايله الصغير .. اللي وصيته ميتفتحش غير في الفسحة واخر اليوم

الولد شكله بقى قمر في اليونيفورم .. أنا خايفة يتحسد انهرده .. خد دش تمام وسرح شعره .. ولبس الباشا كان مكوي .. لبسه لوحده .. أنا معوداه على كده .. وفطار ع السريع كده .. والسندوتشات طبعا

يارب علي يقعد في دكة مناسبة لطوله .. يارب يقعد جنبه ولد جدع .. يارب المدرسين يفرحوا بيه .. يارب الولاد يحبوه .. يارب خليك معاه انهرده

وببوسة كبيرة وحضن واسع سلّمت على حبيبي أنا وبباه .. طبعا بباه اخد ساعتين اذن انهرده عشان يكون معانا .. علي مكانش خايف بالعكس كان فضولي انه يعرف أيه اللي جوه المدرسة دي ..

رحت أنا وبباه على كافتيريا قريبة من المدرسة وشربنا كابوتشينو سوا .. قبل ما يودعني عشان يروح شغله .. متمتماً بكلمتين من نوعية : أنا مش عارفة العيّلة دي حتبطل قلق إمتى

قعدت طول النهار أحضر لعلي كل الأصناف اللي بيحبها وارتب جدول للمذاكرة واللعب والذي منه

جه وقت المرواح

كان نفسي أروح أجيب علي من المدرسة .. بس أنا اتفقت مع بباه نخليه يعتمد على نفسه .. ونجيبه يوم الخميس بس .. آه ياقلبي .. علي اتأخر ربع ساعة .. مش عايزة أطلبه ع الموبايل .. أعمل ايه أعمل ايه أعمل ايه

أهلا ..

لقيت الباشا الصغنن راجع متضايق .. حصل ايه يا سعادة الباشا ؟

أصل يا ماما سمر صاحبتي كان فيه ولد بيشد شنطتها جامد .. رحت زعقت فيه وقلت له عيب كده .. راح زقّني جامد وانتي قلتي لي متضربش حد فمشيت وسبته .. ووصلت سمر لأول شارعهم وجيت .. هي ساكنة ف الشارع اللي بعدنا

قلت له وأنا بساعده يغيّر هدومه : انت يا حبيبي اتصرفت صح .. بس فيه شويّة حاجات حنتكلم فيها وبابا معانا عشان مترجعش متضايق لو ده حصل تاني .. بس بعد ما بابا ييجي ويرتاح

وخدته في حضني وأنا بفكر : نربّي ولادنا التربية الصح ولا نربّيهم التربية اللي تتماشي مع العصر

....

إيمان

صباح يوم جديد

عندما تداعبك رائحة الصبح، وتفتح عينيك متحققًا أنك مازلت موجودًا، ومازالت حجرتك كما تركتها منذ ساعات، ومازالت روحك كما هى تعبث فى جسدك ذهابًا وإيابًا ... وقتها فقط سترحب بصباح يوم جديد ....

عندما تتعثر فى تجربة إنسانية وتتشعر بسقوطك من جلدك إلى حيث لاتدرى... لتغيب فترة لازمنية عن كل مايتلامس وجسدك.. فتعيد بعدها لملمة أجزاءك المتناثرة بشكل هيستيرى تارة ومتزن تارة أخرى ...وأنت فى كامل يقظتك أن لاتفقد جزءً منك سهوًا ... ثم تنجح فى لملمتك مضيفًا لنفسك رتوشًا زادت من جمالك ... حينها فقط تدرك أنك استقبلت صباح يوم جديد....

عندما تطلق لعقلك العنان ليبدع متلامسًا مع روحك فى نقاط تضمن تفردك ... وتستمر تبدع وتبدع.. وتحصد ثمارك فى عيون لاتعكس إلا الحقيقة بدون مجاملة أو تحامل أو ......، فأنت على اعتاب صبح جديد...

عندما تعتزم تمزيق ورقة امتلأت ب"شخابيط" كثيرة ليكون سطرك الأول فى ورقة بيضاء سطورها تختزل جميع مامضى من صفحات فتكتب بخط متوازن وحروف واضحة ورؤية خاصة بك وحدك .... اعلم وقتها أنك امتلكت صباح يوم جديد......

عندما تستيطع أن تنطلق وتفرج عن هذا الجزء الطفولى المحتجز بداخلك فتحلق فى سماواتك دون حدود، تسير بظهرك فى وسط الشارع، وتداعب رغباتك الجامحة فى ملامسة القمر ، واحتضان المارة حولك، وابتلاع الخوف الملازم لك، والتغلب على هذا البخار الناتج من فعل فمك عند ممارسة الشتاء فى لعبة لامنتهية بينكما.... حينها وحينها فقط يتحقق صباحك الجديد.....

عندما تحتسى فنجانًا من القهوة مع صديق لاتجمعكم أى مصلحة سوى الصداقة والكثير من المشاعر الرائعة التى تعزلكم عن العالم لساعات تحلقان فيها بعيدًا حيث لا زيف لاكذب لامجاملة لاشئ إلا الصدق والصدق والصدق..... فكن على يقين أنك تحتكر صباح يوم جديد.....

عندما تعيش حالة من الحب تعلم أنك فيها أنت كما تحب، وهو كما يحب ... تحبه بطريقته ويحبك بطريقتك وتحبان بعضكما بطريقتكما المشتركة والخاصة جداااااا، فتعطى دون نهاية وتأخذ دون طلب .... فهاهو صباحك الجديد.....

أمل ...

انت الأمل اللي احيا بنوره عمره ما يبعد يوم عن عيني

أمل ..
اسم لها منه نصيب كبير .. فهي دائما ما ترى في الأمور الجانب الذي يستحق الثقة .. قوية من الخارج ورقيقة من الداخل .. متسألنيش ازاي :)

إذا كنت تريد صديقا وقت شدتك أو صديق يشدك إذا ضللت فهي أمل .. في العمل بألف رجل .. وفي الحب امرأة بكل معنى الكلمة .. الصدق .. العند .. القوة .. تكبير الدماغ .. البدء من جديد .. الصمت .. الانطلاق .. تلك هي أمل

عمري ما حسيت ان أمل صاحبتي .. طول عمرها رخمة رخامة الاخوات كده ههههه .. بس الحق يتقال يعني :) أمل الصاحبة اللي تثق ان عمرها ما حتبيعك وانها ترد غيبتك وبقوة .. يعني حط فـ بطنك بطيخة صيفي يا معلم .. ناس من القليليين بتوع قل الحق ولو كان مرا .. بحس انها ضهري في الأزمات .. والقلب اللي بيطبطب عليا في الصدمات العاطفية

دايما بتفتح لي شباك جديد للدنيا .. ساعات بيكون موارب وساعات على مصرعيه .. بس لما هي تكتئب بقى مقولكوش :))

نفسي آخد شويّة أمل من أمل وارزعهم جوايا .. :)) قصدي ازرعهم جوايا

الحلم اللي بحلمه بجد إننا نختبر تجارب حياة جديدة سوا واحنا كبار وفاتحين بيوت

أمّا أمنيتي لأمل نفسها أنها تتزرع في وسط جنينة مليانة ورود بيضا عشان احنا شبعنا من الطينة بصراحة

إيمان

إيمى

إيمى بنوته بكل معنى الكلمة ... حاجة كده بيضا أوى وليها نسيم لازم ينعشك...

مش عشان صديقتى بكتب عنها كده، لأ عشان إيمى بجد إنسانة ف زمن الإنسان الحقيقى بقى فيه غريب ...

دايمًا بحس إنها من زمن الأبيض والأسود مش فى بهتانه لأ فى أصالته ورقيه وذوقه المميز وإحساسه المرهف .. وف نفس الوقت البنت دى عليها دماغ لازم تنحنيلها احترام.. دماغ مبدعة وملهمة... بس مشكلتها إنها مش بتعرف تقول أنا إيمــــــان بطريقة واثقة تدى نفسها حقها بيها ... وبالتالى الناس اللى فهمها على قدها مش بتعرف تديها حقها

ولما بقعد مع نفسى بلاقينى محظوظة بيها بجد؛ لأنها تركيبة فريدة يعنى تقدروا تقولوا إنها مزيج من الصديقة والأخت والناقدة والصوت الآخر...

عشان كده بشفق عليها كتير من الحياة دى وبحس إنها راحت عليها نومه وصحيت لقت نفسها فى زمن مش بتاعها بتجاهد عشان تتعامل مع شخوصه ومفرداته... لكنها بفضل إيمانها قدرت تستوعبه شويه شويه .. بغض النظر عن الجروح اللى اتحفرت جواها واللى أنا شايفه إنها زادت من جمالها....

صديقة بفخر بها كثيرًا وبشكر ربنا على وجودها فى حياتى وعارفه إنها بقدر روعتها هتنسج عالمها الرائع ولكن حين تدرك إيمــــــان حق قدرها...